A editorial Embora publica «Contos nerviosos», de Fran Alonso, que se presenta o venres na Feira do Libro de Compostela

Portada_recort

Portada_Contos nerviososContos nerviosos é o inquedante título do novo libro de literatura infantil de Fran Alonso,  que se presentará o vindeiro venres 6, ás sete da tarde (19 horas) na Feira do Libro de Santiago de Compostela coa presenza da escritora María Solar e mais do editor Miguel Toval, de Embora edicións.

O libro Contos nerviosos, publicado pola editorial ferrolá Embora, foi ilustrado por Dani Padrón, que realizou un excelente, divertido e atrevido traballo.

Contos nerviosos conta catro historias distintas, presididas pola imaxinación, que exploran a fronteira entre a realidade e a ficción, e entre a realidade e o mundo virtual dentro do ámbito urbano e da cultura infantil contemporánea. As historias están unidas entre si por pequenas chiscadelas a xeito de ligazóns, así como polo territorio literario Cabrafanada. Nas historias por veces suceden acontecementos tan disparatados que os propios contos se poñen nerviosos. Estes Contos nerviosos están protagonizados por Amelio, un neno que ten unha estraña alerxia ao ruído; por unha nena sen nome que ten unha amiga xirafa en Cabrafanada e recibe mensaxes misteriosas; por un neno que descobre que os videoxogos poden converterse en realidade e por Raíña, unha nena moi fachendosa que se enfada moito na festa do seu aniversario.

Os libros infantís e xuvenís de Fran Alonso, que abarcan a narrativa, a poesía, a biografía e o álbum ilustrado, nunca deixan de sorprendernos pola súa capacidade de empatía e pola súa procura permanente de novos camiños.